Министерството за јавна администрација, во рамки на редовните активности во процесот на координација на иницијативата за Партнерство за отворена власт (ПОВ) и посветената поддршка на институциите и организациите вклучени во овој процес, во периодот 14-15.10.2025 година одржа работни средби по приоритетни области од Националниот акциски план за Партнерство за отворена власт 2024-2026 година.

На работните средби активно учество земаа претставниците на институциите и граѓанските организации во петте приоритетни области: борба против корупцијата, партиципативно донесување одлуки и граѓанско учество, правно зајакнување и пристап до правда, развој и користење на дигитални технологии и унапредување на активностите за климатски промени.

Целта на работните средби беше разгледување на тековната состојба со имплементацијата на заложбите, унапредување на координацијата и динамиката на спроведување на достигнувањата и планирање на наредните активности. Во текот на состаноците се оствари дискусија по поединечните заложби од акцискиот план и степенот на нивната реализација, се идентификуваа предизвиците и се дефинираа конкретни чекори за засилување на активностите во наредниот период.