На спортското игралиште ,,Алумина”, денеска, по тринаесетти пат се одржаа пензионерските спортски игри во Карпош. На оваа традиционална манифестација, која е во организација на Одделението за спорт и култура при Општината, се дружеа членовите од двете карпошови пензионерски здруженија, ,,Карпош” и ,,Тафталиџе’’ и си ги одмерија силите во неколку спортски активности.
Лицата од третото доба, се натпреваруваа во дисциплините шут на гол мажи и жени, а ги одмерија своите сили и во пикадо, фрлање ѓуле, трчање на 60 и 80 метри мажи и жени, додека пак мажите се натпреваруваа во дисциплината скок од место, како и влечење јаже.
Во рамки на овој спортско-рекреативен настан, беа доделени дипломи и пехари за најдобрите натпреварувачи, а останатиот дел од денот беше резервиран за дружба и добро поминато време.